KALIBO, Aklan—Eubus ro suporta nga gintao ag ginpakita it lokal nga gobyerno it Kalibo sa Fashion & Design Council of Aklan Philippines Inc. sa ginpatigayon nga Ati-Atihan Fashion Festival nga madinaeag-on nga natigayon sa Pook Jetty Port, Brgy. Pook, Kalibo, adlaw it Sabado.
Suno kay Giselle Quimpo, event manager it nasambit nga aktibidad, parehas ro naging katuyuan it lokal nga gobyerno ag nasambit nga organisasyon nga mai-showcase ro ginapabugae nga produkto it Kalibo pinaagi sa pagrampa it mga designing clothes nga ro kaeabanan hay himo sa piña fiber weaving.
Suno pa kay Quimpo, ginpatigayon ro event sa nasambit nga lugar agud nga mai-promote ro local tourist spot it banwa ag bukon eamang it sa mga usual nga lugar nga kilaea eon nga adtunan it mga tawo.
Madumduman nga ro nasambit nga event hay ginpatigayon ko nagtaliwan nga dag-on sa old Kalibo bridge nga nagakonekta patabok sa banwa it Numancia.
Nasayuran nga kapin sa 14 ka mga designer ro nagpasakop kon sa siin tatlo sa mga raya hay international nga nakabase sa Dubai, UAE ag London, United Kingdom samtang ro iba hay nagapasuksok sa andang mga designs sa mga sikat nga artista ag modelo.
Ro nasambit nga fashion show hay kaparte it weeklong celebration it Kalibo Ati-Atihan Festival 2025 nga ginakabig man nga Mother of All Philippine Festivals.
