Kalibo Aklan —–Gin-umpisahan eon it lokal nga gobyerno it Madalag ro pagpanueopod it mga relief goods sa 25 ka Barangay nga nasakupan it nasambitang banwa.
Suno kay Madalag Mayor Al Dindo Gubatina II, ro andang ginapanueopod hay halin sa 30 percent nga quick response fund it Munisipyo kasunod it declaration it public health emergency ni Pangueong Rodrigo Duterte.
Ro relief goods hay ginakaeakipan it 5 kilong bugas, 6 nga sardinas, 4 nga karne norte, sambilog nga kape ag daywang ka gatas.
Mag-eowas kara, nagpanupod man sanda it seedlings sa mga pumueoyo agud nga itanom it mga raya bangud nga inde masayuran kon hasta san-o matapos ro krisis nga ginapangatubang it bilog nga kalibutan.
Ginpahayag dugang nga ro seedlings hay gintaeana sa kada household agud nga samtang nagaduhong sa andang tagsa ka panimaeay hay maghugod eon lang ro mga raya sa pagpananom maskin sa andang ugsaran.
Una kara, anang ginmanduan ro tanan nga Punong Barangay sa anang nasakupan nga banwa nga sa pag-umpisa pa eamang it enhanced community quarantine hay magpanupod eon ro mga raya it relief goods base sa nabilin nandang pondo.
Sa makaron suno kana hay nakatutok ro lokal nga gobyerno sa pagmonitor sa mga tawo nga inde makaguwa it andang komunidad kon uwa manlang it importante nga panaw.
Ginpahayag dugang nga 24/7 ro pagbantay sa mga border area it banwa agud nga makontrol ag malimitahan ro pagguwa sueod it mga tawo.
