KALIBO, Aklan—Ginaduso makaron it lokal nga gobyerno it Malay ro pag-franchise it kapin sa 200 ka mga E-trike sa isla it Boracay bilang preparasyon sa hana nga pag-total phase out sa mga de-gasolinang tricycle.
Antes nga igapatuman ro nasambitang tikang hay kinahang-ean nga makaangkon anay it resolusyon sa Sangguniang Bayan pinaagi sa Committee on Transportation.
Tyempo eon sigon nga madugangan ro presenteng 540 franchise E-trike bangud sa nagalobo nga mga turista ag residente sa isla.
Madumdumang makapilang beses eon nga na-extend ro pag-phase out it tricycle bangud nga posibleng pagakueangon ro mga saeakyan sa isla.
Mag-eowas kara, ro 180 units it e-trike nga donasyon it Department of Energy ukon DOE hay uwa naipanupod bangud sa mga prosesong pagaagyan it mga benipisyaryo kaparehas it “undertaking”.
Samtang, ginpaburan man it Boracay Land Transportation Multi-Purpose Cooperative (BLTMPC) ro tikang it lokal nga gobyerno bangud sa ginaduso man it mga raya ro pagbaylo it andang mga unit.
Suno kay BLTMPC Vice Chairman Prudencio Vargas, may proposal eon man sigon sandang ginpahaom para dikara ag para sa ginahandom nga change of unit hay may an-om eon sandang E-Jeep nga daywa kara hay solar-operated Mini Bus.
