Kalibo Aklan ——Uman nga magapatigayon it dry-run ro lokal nga gobyerno it Malay kaibahan ro iba pang natungdan nga ahensiya it gobyerno makarun nga 3:00 sa hapon bilang pagpahaum para sa uman nga pagbukas it tourism operations sa Isla it Boracay.
Suno kay General Manager ag Boracay Foundation Incorporated President Edwin Raymundo, pila sa andang nakaibahan sa dry run hay ro mga taga-Department of Tourism (DoT), Department of Environment and Natural Resources (DENR) ag iba pa.
Gindugang pa ni Raymundo nga magapaguwa ro BFI, grupo it mga negosyante sa Isla it mga rekomendasyon sa provincial government angot sa andang magiging assessment sa daywang adlaw nga dry run nga gin-umpisahan kahapon nga adlaw it Lunes.
Hinyu man nanda sa gobyerno nga indi anay sanda pagsukton it buwis sa masunod nga dag-on bilang kaparte it andang recovery process sa epekto it pandemya .
Nasayuran nga ko buean it Marso hay gin-lockdown ro Isla agud nga malikawan ro pagkalhit it makamaeatay nga virus.
Nasayuran nga ro mga residente pa eamang ag pilang stranded nga mga dumueuong nga turista ro ginpasugtan it LGU-Malay nga magpaligos sa dagat samtang owa pa natapos ro dry run sa pagbalik it operasyon it turismo.
Mag-eowas sa “no transaction, no entry” policy, ginapatuman man makaron sa Isla ro “no, swimming, no registration” policy, kun sa siin, kinahangean nga magpalista anay sa life guard station ag magpabo-oe it body temperature antes nga mag-eusong sa tubi.
Mandatory man ro pagsuksok it face mask mag-eowas kun magapaligos sa dagat.
Bawae man nga mag-overnignt ro mga nagapasueod sa Isla nga nakikipag-transaksyon.
Samtang, nakakalhit makaron sa beachfront ro sangkaterbang beach guards, marshalls, mga securities, mag-eowas pa sa mga pulis, miyembro it Philippine Coast Guard ag Maritime Command agud nga masigurong ginasunod ro ginapatuman nga guidelines eabi eon ro daywang metrong distansya sa mga nagapaligos sa gintaeana nga ap-at nga swimming areas sa Isla.
Bukas ro beachfront umpisa alas-6:00 hasta alas 10:00 it agahon ag umpisa alas-3:00 hasta alas-6:00 it gabi-i.
Ro Aklan hay sa idaeum makaron it Modified General Community Quarantine sa tunga it coronavirus disease (COVID 19)pandemic.
