Ginapatuman eon it lokal nga gobyerno it Tangalan ro compressed four-day workweek ag iba pang tikang sa pagtipid it fuel ag kuryente bangud sa pagtaas it presyo it langis sa kalibutan nga tuga it naga-grabeng tensyon sa Middle East.
Ginpaathag ni Tangalan Mayor Gene Fuentes nga tuyo it nasambit nga pagbag-o nga mabawasan ro konsumo it kuryente ag fuel samtang nagapadayun ro serbisyo publiko.
Sa idaeum it four-day on-site schedule, magatrabaho ro mga empleyado Lunes hasta it Huwebes, alas 7 it agahon hasta alas 6 it gabi-i.
Apang suno kana nga bukon it kaibahan sa nasambit nga patakaran ro mga taeatapan nga nagatau it importanteng serbisyo kapareho it rural health unit, public safety, disaster response ag iba pa.
Magatrabaho ro nasambit nga mga empleyado it Lunes hasta it Miyerkules, alas-7 it agahon hasta alas-4 it hapon, samtang sa Huwebes hasta it Biyernes hay regular nga oras it pagtrabaho nga alas-8 it agahon hasta alas-5 it hapon.
Dugang pa ni Mayor Fuentes nga ro nasambit nga tikang hay sandig sa direktiba ni Ferdinand Marcos Jr. sa idaeum it Memorandum Circular No. 114, nga nagatuyo nga bawasan ro paggamit it enerhiya it gobyerno ag mapahagan-hagan ro epekto it pabag-u-bag-ong presyo it fuel sa bilog nga kalibutan.
