KALIBO, Aklan–Magatukod it tricycle task force ro kada Local Government Units ukon LGUs agud nga maka-develop it bag-ong rota nga paga-agihan it mga tricycles nga indi eon maga-agi sa national highway.
Raya ro ginpahayag ni Ibajay Mayor Jo-en Miraflores, presidente it mayors league of the Philippines Aklan chapter matapos nga makipaghin-unon kay Department of Interior and Local Government ukon DILG provincial director Engr. Carmelo Orbista.
Suno kana nga trabaho it task force nga magpatigayon it meetings, public consultations ag hearings sa mga stakeholders, kamana man nga magpatigayon it survey ukon ocular inspection sa mga lugar nga gina-agihan it mga tricycle.
Raya hay kasunod it direktiba it DILG partikular ro memorandum circular 036-2020 nga ginpaguwa ko Pebrero 17, 2020 nga magatau sa mga munisipyo it 30 diyas agud nga makahimo it tricycle routes ag mapatuman ro ban sa national highway, pag-identify sa andang national roads sa andang hurisdiksyon ag pag-determine sa presente ag ginaproponer nga rota sa pag-draft it tricycle route plan.
Apang ginpahayag ni Mayor Miraflores nga pagataw-an man gihapon it konsiderasyon it DILG ro mga munisipyo nga owa it alternatibong rota para sa tricycle eabi eon sa Aklan nga kaeabanan hay raya ro mode of transportation.
