Washington, USA — Libo-libong mga pumueoyo halin sa nagkaeain-eain nga parte it Estados Unidos ag pilang kaeapit nga nasyon ro nakipagbahin sa maeapnagong protesta kontra kay Pangueong Donald Trump ag sa anang kaalyadong bilyonaryong si Elon Musk.
Suno sa mga organizer, may kapin sa 1,200 ro nag hub-eag-protesta nga ginpatigayon sa 50 estado it Estados Unidos kaibahan ro pilang lugar sa Canada ag Mexico.
Ginakabig raya bilang kauna-unahang mabahoe nga demonstrasyon kontra kay Trump halin kat magpungko imaw it uman ko Enero.
Nagkaeain-eain nga sektor ag grupo ro nakipagbahin halin sa mga retiradong propesyonal hasta sa mga estudyante ag ordinaryong pumueoyo.
Ginpahayag it mga raya ro andang kabaeaka sa mga polisiya ni Trump kaparehas it posibleng pagbungkag sa Social Security, pag-untat sa pondo para sa research sa medisina, ag maeapnagong taripa nga suno kanda hay makatuga it maeapnagong kawad-an it trabaho.
Samtang nagakatabo ro protesta, si Trump mat-a hay naghampang it golf sa Florida ag nagbalik sa anang Mar-a-Lago estate.
