KALIBO, Aklan— Inde mahueogan it dagom ro mga deboto nga nakipagbahin sa misa ag prusisyon nga ginpatigayon it St. John The Baptist Cathedral sa kaadlawan it kapiyestahan ni Sr. Sto. Niño De Kalibo.
Naging sentro sa homiliya ni Bishop Jose Corazon Tala-oc it Diocese of Kalibo ro pag-engganyo kara sa mga pilgrims ag political leaders nga buligang makaangkon it disenteng trabaho ag pangabuhian ro mga Aeta nga presenteng naga-istar sa isla it Boracay, sa banwa it Kalibo, Altavas ag Batan.
Samtang, inde man magkamayaw sa pag-alsa it kanya-kanyang daeang imahe ni Sr. Sto. Niño ro libu-libong deboto agud ipaabot ro andang debosyon sa batang Hesus matapos ro pilgrim mass samtang ginatukar it dueoeongan it 34 nga banda it mga tribu ag grupo ro kantang “Happy Days Are Here Again”.
Sa pihak nga parte, sa interview it Bombo Radyo sa pilang deboto ag festival goer, nakadugang sigon sa andang kalipay ro pagdaog ni Sen. Manny Pacquiao kontra kay Adrien Broner matapos nga mabalitaan sa pilang social media sites ro pagdaog it fighting senator.
Ginpangamuyo pa sigon nanda kay Sr. Sto. Niño ro kaeowasan ag kadaeag-an it pambansang kamao.
Nagmonitor ag nagbantay ro kapin sa 1,500 nga mga pulis sa palibot it festival area hasta sa natapos ro Kalibo Sto. Niño Ati-atihan Festival 2019.
