Ginkasubo ni Aklan first district board member Nemesio Neron nga hasta sa makaron hay uwa gihapon nakit-an ukon uwa gihapon naibalik ro lingganay it andang chapel sa Brgy. Sigcay, Banga matapos nga tinakaw it uwa gihapon makilaea nga mga manakaw.
Suno kana, dapat nga ginarespeto ro panimaeay it Diyos apang may mga tawo nga halang ro kaluluwa kon sa siin nahimo pang takawon ro propyedad nga ginapanag-iyahan it simbahan.
Ginapatihan it opisyal nga may kilaea sa andang barangay ro mga manakaw apang bukon sigon raya it taga-una rason nga hasta sa makaron hay uwa gihapon senyales kon sa siin makit-an ro nasambit nga lingganay.
Uwa eon suno kana it ginamit nga lingganay nga pangbagting ko kasagsagan it pagpatigayon it misa ko simbang gabi.
Angot kara, nagtanyag it kapin sa P5,000 pesos nga pabuya ro opisyal kon sin-o man ro makata-o it impormasyon kon siin eon makaron ro lingganay ukon maturo kon sin-o ro responsable sa nasambit nga panakawan.
Madumduman nga tinakaw man ro lingganay it chapel it Brgy. Mataphao sa banwa it New Washington ag hasta sa makaron hay uwa man raya naibalik ukon nakit-an eon it mga pumueoyo it barangay.
