POLICE Report — Nasapwan sa balkonahe it anang baeay ro sangka 83-anyos nga lola nga owa eon it kabuhi ag putoe ro ueo, sa Brgy. Candabong sa banwa it Dumanjug sa southwestern Cebu ko Sabado it agahon, Pebrero 1.
Sa imbestigasyon it Dumanjug police, nakilaea ro namatay nga si Miguela Barino, nga ginapatihan nga namatay bangud sa heart attack.
Ginbo-oe eon ro ibang rason sa pagkamatay it biktima.
Sa pihak kara, ginakonsidera it pulisya nga posibleng ro mga ayam ro nagputoe sa ueo it magueang.
Nasapwan ro ueo ni Barino sa idaeum it hagdan.
Ginpahayag ni Police Captain Eden Rex Baguio, hepe it Dumanjug Police Station, nga ro eawas ni Barino hay una sa state of decomposition kat makit-an.
Bangud sa makarondaya nga sitwasyon it eawas it magueang, posibleng napag-interesan it mga ayam nga kaunon raya ag nag-umpisang angkiton sa leog rason para mahueog ro ueo it magueang.
Inabot pa it kapin sa 48 oras ukon daywang adlaw antes nga nadiskubre it mga igbata ro eawas ni Barino.
Naga-isaehanon eamang nga naga-istar sa anang baeay si Barino matapos nga mamatay ro anang asawa may 10 dag-on eon ro nagtaliwan.
Owa it unga ro mag-asawa ag maeayo man ro anang ilistaran sa mga kaeapitbaeay.
Ro kaibahan eamang it magueng hay ro anang limang ayam.
