KALIBO, Aklan — Una sa kritikal nga kondisyon makaron ro sangka 65 anyos nga lolo matapos nga gina-alegar nga ginsug-an ro payag nga anang gina-istaran, bandang alas-3:30 hapon it Miyerkules sa Brgy. Camaligan, Batan.
Suno kay Norma Abayon, residente it nasambit nga lugar ag nakasaksi sa insidente nga nakaangkon it paso sa nagkaeain-eain nga parte it eawas ro biktimang si Roberto Occeño nga padayun nga gina-obserbahan sa Intensive Care Unit (ICU) it Aklan Provincial Hospital.
Matapos nga makita nga nagakasunog ro anang baeay hay nabatian it mga residente maeapit sa lugar nga nagapangayo raya it tabang.
Gin-aku sigon it biktima sa mga awtoridad nga ginsug-an nana ro anang gina-istaran bangud sa problema sa pamilya nga anang ginapangatubang .
Ginasugid nga makapilang beses eon nga ginpa-summon it barangay si Occeño bangud sa pag-gubat sa anang asawa ag mga unga nga may daea nga hinganiban kada una sa impluwensiya it aeak.
Matapos nga magbueag sa anang asawa, ginasugid nga nagtukod raya it anang kaugalingon nga payag nga maistaran sa kilid it suba sa nasambit nga lugar.
Ginadudahan nga depression ro posibleng motibo it biktima sa hana nga pagsunog sa anang kaugalingon .
Apang nagapadayun pa ro imbestigasyon it Batan Municipal Police Station sa insidente.
