Kalibo Aklan ——-Gin-anunsyo it Land Transportation Office (LTO-Aklan) nga magabukas eon ro andang opisina ag magabaton eon sanda it mga nakabinbin nga transaction it mga drivers ag motorista.
Suno kay LTO-Aklan head Engr. Marlon Velez, umpisa sa makarun nga adlaw, Mayo 13 hay magabaton eon sanda it kliyente apang kinahang-ean nga i-obserba ro social distancing ag 120 clients eamang ro andang batunon sa sueod it sang adlaw.
Angot kara, kinahang-ean nga magpa-apointment anay sa andang opisina ro may transaction pinaagi sa pagtawag ukon pagtext sa mga numero nga nakaposting sa andang opisina.
Ginpahayag ni Engr. Velez nga pagasundon nanda ro “no appointment, no transaction” policy bilang pag-adjust eon man sa “new normal” nga ginatawag.
Kinahang-ean suno kana nga makapresentar it transaction code ro sangka kliyente antes nga maproseso ro andang tuyo sa opisina.
Samtang, ro mga senior citizens ag ro naga-edad it 20 anyos panaba hay inde pwede magproseso it transaction bangud nga una nakabutang gihapon ro bilog nga probinsya it Aklan sa general community quarantine.
Mag-eowas kara, rehistro it behikulo ag renewal it driver’s license eamang ro andang ginaproseso nga nag-expired eon sa buean it Marso hatsa it Abril.
Ro may plano nga magbueo it student permit ag bag-ong driver’s license hay uwa anay nanda raya ginaproseso sa makaron nga tyempo.
Samtang sa pihak nga parte, nagdeploy sigon imaw it tawuhan nga maga-usisa sa mga daeanon ag terminals agud nga masiguro kon ginasunod it mga motorista ag drivers ro nakabaehag sa guidelines it DOTr kamana man sa ginpaguwa nga Executive Order ni Aklan Governor Florencio Miraflores para inde eon magkalhit pa ro 2019 coronavirus disease (COVID-19).
