KALIBO, Aklan— Ginkaguluhan ag ginkakibot it mga pumueuyu ro mabahoe nga oarfish nga gindagsa sa bibi it baybayon nga sakop it Barangay Poblacion, New Washington, Aklan.
Suno kay Aquaculturist II Rico Magno it Bureau of Fisheries and Aquatic Resources (BFAR)-Aklan, raya ro unang beses nga may napadpad nga oarfish sa nasambit nga lugar nga may habang 3.15 meters, eapad nga 30 centimeters ag bug-at nga naga-abot sa 20 kilos.
Suno kana nga posibleng nadisturbo ro ilistaran it isda nga kaeabanan nga naga-istar sa Atlantic Ocean ag Mediterranean Sea nga may maeamig nga temperatura.
Ginapatihan nga raya hay may kaangtanan sa natabu nga linog kan-o eamang sa Southern California.
Nasayuran nga mahina eon ro nasambit nga isda kat ginhaw-as it mga mangingisda kun sa siin, matapos mausisa it BFAR hay anda raya nga gin-eaha ag gin-obra nga sumsuman.
