KALIBO, Aklan—Nagpaabot it pakikisimpatiya si Madalag mayor Al Dindo Gubatina sa pamilya it sangka soldado nga namatay matapos ro bakbakan sa tunga it tropa it Philippine Army ag New People’s Army Komiteng Rehiyon-Panay ko Abril 7 sa nabukid nga parte it Sitio Aguilan, Barangay Panuran sa Lambunao, Iloilo.
Gin-aywan it 24 anyos nga soldado ro anang asawa nga si Erica ag unga nga si Anicah.
Si Private First Class Mark Nemis, residente it Barangay Galicia, Madalag it 301st “Bayanihan” Infantry Brigade nga nakabase sa Camp Hernandez, Dingle, Iloilo hay napatay samtang nga nagapatigayon it security patrol ag nagatau it impormasyon sa mga residente angot sa coronavirus disease kat makaengkwentru ro indi pa matumod nga numero it mga rebeldeng NPA nga ginapangunahan ni Carl Teodosio alias ‘Andoy ukon Ami’.
Ginasugid nga antes ro engkwentru hay pilang mga pumeuyu ro nag-report nga may naispatan nga mga rebelde sa nasambit nga lugar ag gina-alegar nga nagapangikil sa mga residente.
Nagbuhay ro bakbakan sa sueod it 20 minutos antes nga natabog it tropa ni Second Lieutenant Roel Duran ro mga rebelde paagto sa parte it Janiuay, Iloilo.
Narekober sa lugar ro backpack nga may sueod nga mga subersibong dokumento, M16 long magazine ag mga bala sa ginpatigayon nga clearing operation.
Nauna kara, hugut nga ginkundina ni 3ID commander Major General Eric Vinoya ro natabu nga pagpang-atake sa tunga it ginapatuman nga unilateral ceasefire nga gindeklara ni Presidente Rodrigo Duterte sa NPA ag National Democratic Front (NDF).
Sa makaron hay nagabulig man ro mga soldado sa lokal nga gobyerno sa pagpatigayon it quarantine border control points sa Antique, Capiz, Iloilo ag Aklan kontra COVID-19.
