KALIBO, Aklan — Gin-umpisahan ko Biyernes nga adlaw, Hulyo 19, ro maeapnagon nga paglimpyo sa bilog nga probinsiya it Aklan agud nga maproteksyunan ro mga pumueuyu kontra sa sakit nga dengue.
Sa mandu ni Governor Florencio Miraflores, pagahimuon kada Biyernes alas-3:00 hasta alas-5:00 it hapon ag kada Sabado alas-7:00 it agahon hasta alas-9:00 it agahon sa sueod it ap-at nga sunod-sunod nga domingo agud nga makalikaw sa dengue ag masiguro ro ikamayad nga eawas it kada Akeanon.
Angot kara, nagpa-abiso si Dr. Cornelio Cuatchon it Provincial Health Office ukon PHO nga indi maalarma bangud nga bilang senyales it pag-umpisa it paglimpyo hay dueueungan nga magapatunog it sirena it mga ambulansiya ag emergency vehicles it PDRRMO ag nagkaeain-eain nga MDRRMO.
Raya hay bilang sabat man sa direktiba it Department of Interior and Local government ukon DILG angot sa clean-up operation sa tanan nga mga lokal nga gobyerno, kabarangayan, eskwelahan ag iba pang taeatapan .
Suno kay Dr. Cuatchon nga ugali-on ro paglimpyo sa palibot , pag-usoy ag pagsamad sa mga lugar nga ginapamugaran it mga namok nga nagadaea it dengue, self-protection, early consultation ag paglikaw sa indiscriminate fogging.
Ro pagtaas it kaso it dengue ro naging rason sa pagdeklara it dengue outbreak sa bilog nga probinsiya.
Kaibahan sa ginapalimpyuhan hay ro mga baradong sagilong ag kanae, mga ginatawag nga natural container kapareho it mga butong ag maskin ro mga tanum nga bromeliad ag iba pa.
Base sa pinaka-ulihi nga listahan it PHO, naga-abot eon sa 2,540 ro numero it kaso it dengue sa bilog nga Aklan umpisa Enero hasta Hulyo 13 it makaron nga dag-on.
