KALIBO, Aklan — Uman nga nagpadumdom ro Provincial Employment Service Office (PESO)-Aklan sa publiko kontra sa mga recruiter nga nagagamit it social media agud makapambiktima it mga gustong magtrabaho sa ibang nasyon.
Raya hay kasunod it napabalitang 11 Aklanon ro nabiktima it mag-asawang illegal recruiter nga ginkilaeang sanday Kevin Paul ag Jessa Marie Señeres, residente it Lezo, Aklan ag presenteng naga-istar sa Metro Manila.
Sa interview it Bombo Radyo, ginpahayag ni Vivian Ruiz-Solano, PESO-head nga makasueobo ro natabo bangud mabuhay eon nandang ginapaandaman ro publiko sa recruitment scam gamit ro social media kaparehas it facebook.
Nasayuran nga nagapangayo ro mag-asawang illegal recruiter it P28,000 sa kada aplikanteng ginapromisahan it trabaho sa sangka restaurant sa Malaysia nga may bueanang sweldo nga P39,000.
Eaygay pa ni Solano sa mga nagausoy it trabaho sa ibang nasyon nga i-check sa Philippine Overseas Employment Administration (POEA) kon lehitimo ro recruitment agency ukon recruiter nga nagasumbil it trabaho.
Mahimo man sigon nga makipag-angot sa andang taeatapan.
Nasayuran nga mag-eowas sa 11 Aklanon, ginapabutyag nga 17 iba pa ro nabiktima it mag-asawa sa Metro Manila.
