Mahigit 23,000 pasyenteng may cancer ang natulungan ng Department of Social Welfare and Development (DSWD) sa ilalim ng Assistance to Individuals in Crisis Situation (AICS) program noong 2025. Aabot sa mahigit PHP200 milyon ang naibigay na medical assistance bilang bahagi ng suporta ng pamahalaan sa mga sektor na nangangailangan.
Ang AICS ay isang social protection program ng DSWD na nagbibigay ng tulong-medikal, pinansyal, pagkain, transportasyon, at burial assistance sa mga mahihirap at bulnerableng Pilipino na dumaranas ng krisis.
Para sa 2026, tumaas nang malaki ang pondo ng AICS mula PHP26.98 bilyon sa National Expenditure Program patungong PHP63.85 bilyon sa ilalim ng General Appropriations Act, upang mapalawak pa ang saklaw ng benepisyo.
Nakatakda ring paigtingin ng DSWD ang implementasyon ng programa sa pamamagitan ng digital issuance ng guarantee letters bilang bahagi ng digitalization at pagpapabilis ng mga proseso ng pamahalaan.
