Nagabilog it impeachment complaint ro Makabayan Bloc kontra kay Vice President Sara Duterte.
Suno kay Makabayan Coalition Vice President Teddy Casiño, ro mga isyung ginapangatubang ni Vice President Sara hay seryoso ag bukon it simpleng krimen kaparehas it inde maipaathag nga paggastos it confidential ag intelligence fund, paghana it Office of the Vice President nga tabunan ro anomalya sa paggastos it nasambit nga pondo, mga kontrobersyal nga statement it bise presidente angot sa pagpatay kanday Pangueong Ferdinand Marcos Jr., First Lady Liza Marcos, ag House Speaker Ferdinand Martin Romualdez.
Ro mga nasambit nga isyu sigon hay pwedeng makabig bilang ground para sa graft and corruption, betrayal of public trust ag iba pang high crimes nga basehan para sa impeachment complaint, base sa probisyon it konstitusyon.
Presente sigon nga nagapaidaeom sa assessment it legal team it Makabayan ro tanan nga ebidensiya agud makabilog it solidong kaso para sa daeayong pagpakakas kay Vice President Duterte.
Dugang pa ni Casino, saea nga kabigon ro tanan nga isyu it bise presidente bilang simpleng political issue sa baylo, seryosong paeag ro mga raya sa gobyerno ag sa bilog nga nasyon.
Samtang sa pihak nga parte, ginkasubo ni Casiño ro naging pahayag ni Pangueong Ferdinand Marcos Jr. nga ginakabig kara nga “waste of time” ag uwa it mapala ro mga nagabilog it impeachment complain kontra sa nasambit nga bise presidente.
Ginpanindugan ni Casiño nga bukon it pag-uyang sa oras ro pagpasabat sa mga matag-as nga opisyal nga mapang-abuso sa andang poder, may isyu it pagpanakaw ag iba pa.
Suno pa kana nga bukon it simple ag maisot nga bagay ro ginapangatubang nga isyu it bise presidente ag maskin anu pang posisyon sa gobyerno hay kinahang-ean nga mapanabat sa laye.
Makasueobo sigon nga mismong presidente pa it nasyon ro uwa nagapabor sa andang plano apang uwa sanda nagaduea it pag-eaum nga makakita it indibidwal nga nga maga-sponsor sa igadihon nga impeachment complaint.
