KALIBO, Aklan— Nagaeaum ro kilaeang make-up artist nga si Barbi Chan nga magasirbing wake-up call sa mga natungdan ro anang reklamo may kaangtanan sa kakueangan it medical facilities sa isla it Boracay.
Raya hay matapos nga owa sigon nataw-an it nagakaigo nga pagbueong ro anang unga nga babaye kat makaangkon raya it eagnat ag may kaibahan nga kombulsyon samtang nagabakasyon sa isla ko Bag-ong Dag-on.
Ginpaagi ni Chan sa social media ro masalimuot nga inagihan sa Boracay nga dapat kunta hay masadyang bakasyon.
Ginsaysay nana nga gindaea sigon nanda sa sangka maisot nga klinika ro anang unga bangud nga owa it ospital sa isla ag ro pinakamaeapit hay sa banwa pa it Kalibo nga haeos sang oras ag tunga ro biyahe.
Apang, kinahangean pang maghueat it pagka-aga bangud nga owa eon it masakyan.
Maskin sigon nga ginakombulsyon ro anang unga hay owa it ginhimo ro nag-check-up nga doktor kundi nga taw-an it sponge bath ag paracetamol agud nga magnaba ro eagnat nga naga-abot eon sa haeos 40 degrees.
Samtang, ginbatikos man kara ro air ambulance nga nagdaea sa anang unga sa Manila matapos nga magpamalibad nga magpanaw nga owa it paunang bayad kamana man ro ginsakyan nga ambulansiya nga matsa multicab eamang nga nagsukot kana it kapin sa P10,000 pesos halin sa Caticlan jetty port hasta sa airport nga haeos limang minuto eamang ro biyahe.
Mabuhay eon nga ginareklamo it mga turista ro kawad-an it ospital sa Boracay nga sambilog sa mga kilaea ag ginadayo nga tourist destination.
Sa makaron hay ginatinguhaan it Bombo Radyo Kalibo nga mabo-oe ro komento it lokal nga gobyerno it Malay angot sa nasambit nga isyu.
