Binasura ng Malacañang ang alegasyon ni dating Ako Bicol Party-list Rep. Zaldy Co na ang mga kasong graft at malversation laban sa kanya ay may motibong pampulitika, kasunod ng kanyang petisyon laban sa Office of the Ombudsman sa Korte Suprema.
Umalis si Co ng Pilipinas noong 2025 at tumangging bumalik habang isinasagawa ang imbestigasyon sa umano’y anomalya sa mga flood control at iba pang proyektong pampubliko. Itinanggi ng pamahalaan ang kanyang mga paratang at kinansela ang kanyang pasaporte, ngunit nananatili siyang hindi nadadakip dahil sa hawak na foreign visa at pasaporte.
Batay sa mga ulat, namataan si Co sa iba’t ibang bansa sa Europa, kabilang ang Portugal at Sweden. Dahil dito, pinalawak ng pamahalaan ang operasyon sa paghahanap sa kanya hanggang sa Scandinavia habang nagpapatuloy ang pagtukoy sa kanyang eksaktong kinaroroonan.
