Kalibo, Aklan-Blangko pa si Malay Mayor Frolibar Bautista kon madayun ukon indi ro ginaplano nga pagpatindog it Boracay-Caticlan bridge nga nagabalor it P5.5 bilyon nga ginasueong it sangka mabahoe nga kompaniya.
Suno kana nga umpisa ko dag-ong 2013 hasta makaron nga 2024 hay naeakip sa andang comprehensive land use plan (CLUP) ro nasambit nga proyekto.
Dugang pa it alkalde nga kinahangean nga mabatian it uman ro opinyon it komunidad ag stakeholders agud nga matimbang ro epekto it proyekto nga pagapondohan it San Miguel Corporation (SMC).
Nauna eon nga nagpahayag it pagkabaeaka sa bombo radyo ro tag-ana it mga nagabiyahe nga motorbanca nga ro proyekto hay makaangkon it maeain nga epekto sa ekonomiya ag pangabuhian nanda .
Ro ginaproponer nga tulay nga may haba nga 1.2 kilometer hay igatukod sa Tabon Caticlan patabok sa Manocmanoc sa isla it Boracay.
Engkaso nga madayun, ro tulay hay magasirbing all-weather access para mapadasig ro transportasyon kapareho it paghakot it basura patabok sa mainland Malay; pag-transport it pasyente kun may emergency ag eabaw sa tanan hay malikawan eon ro pagka-stranded it mga bakasyunista, turista, trabahador ag residente sa oras nga makaangkon it maein nga paniempo.
