KALIBO, AKLAN – – – Ginkumpirma ni Sanggunian Bayan Member Dante Pagsuguiron it banwa it Malay nga ginpasakaan nanda it kaso sa office of the Ombudsman-Visayas si Mayor Ceciron Cawaling bangud sa mga iregularidad kara.
Kaibahan sigon kara nga nagpasaka it kaso sanday SB Members Jupiter Gallenero ag Lloyd Maming.
Si Mayor Cawaling hay nagapangatubang makaron sa kasong administratibo .
Suno sa mga nagareklamong konsehal nga nagapaguwa it fake tickets ro mga tawuhan ni Mayor Cawaling agud nga magpatigayon it independent collection sa snorkeling fee nga 40 pesos sa isla it boracay.
Imbes sigon nga maagto ro pondo sa Munisipyo it Malay hay naga-agto raya sa boesa it pilang indibidwal nga may pahanugut it alkalde .
Ro koleksyon sigon it snorkeling fee hay sandig sa Municipal Revenue Ordinance No. 279, series of 2009, nga kun sa siin may 50 porsyento nga share ro mga mangingisda nga miyembro it Malay Fisherfolk and Seaweed Planters Association, INC., nga sanda ro nagadumaea sa onse tanan nga mga natumod nga snorkeling area sa isla.
Ro snorkeling hay sambilog sa mga aktibidades nga gina-enjoy it mga turista nga nagabakasyon sa Boracay.
