KALIBO, Aklan–Gintaw-an it punto it sangka dietitian nga importante ro pagkaon it malimpyo ag euwas nga pagkaon.
Raya hay para makalikaw sa mga food-borne diseases ukon food poisoining halin sa mga pagkaon nga atun nga ginakaon ag gina-inom.
Ro food-borne diseases hay nagatumod sa mga sakit nga nabubuoe halin sa pagkaon nga posibleng naga-angkon it nagkaeain-eain nga klase it mikrobyo, bacteria, viruses ag parasites.
Ro iba hay posibleng bangud sa lason, toxins ag chemicals nga nahalo sa pagkaon.
Suno kay Leah Valencia Tugade, registered nutritionist-Dietitian, masami nga nabubuoe ro mga sakit bangud sa bukon it maayos nga pagprepara it pagkaon.
Dapat sigon nga maging malimpyo ag madahan sa pagpahaum para masiguro nga raya hay euwas.
Gin-insister pa kara nga madasig ro pagsueod it bacteria sa eawas it sangka tawo halin sa alima paadto it baba.
Pila sigon sa mga dapat tandaan kung nagaprepara it pagkaon hay siguraduhon nga nalimpyuhan it mayad ro mga kitchen utensils antes gamiton; eahaon it mayad ro pagkaon; maging mausisa sa expiry dates; hugasan it mayad ro mga tinuea ag prutas; likawan ro pagsamit sa mga pagkaon agud nga masayuran kung raya hay pwede pang kaunon ag pilion ro mga lugar nga ginakan-an.
Ro mga nabdos, may mga mahina nga immune system, eapsag ag senior citizen hay high risk para sa mga makarondaya nga klase it baeatian rason nga mas mayad nga mag-doble dahan.
Engkaso nga mag-grabe ro pagsakit it tiyan, pagsuka ukon diarrhea mas mayad nga magkonsulta eagi sa doktor.
