Kalibo Aklan——-Maskin nga owa pa nabaton ro show cause order halin sa Department of Interior and Local Government (DILG) haum eon ro magiging sabat ni Malinao Mayor Josephine Equiña kon ham-an nga napas-eawan sanda nga makompleto ro distribution it first tranche it Social Amelioration Program (SAP) sa tamang oras.
Sa kamatuoran suno kana hay gina-kwestiyon nana kon ham-an nga naeakip sanda sa 48 nga mga alkalde nga gin-isyuhan it show cause order bangud nga naka-eagas man sanda sa ikaywang deadline nga gintau .
Ko abril 30 suno kana hay nag-apela imaw sa DSWD Region 6 it extension.
Maskin suno kana si DILG Provincial Director Engr. Carmelo Orbista hay owa man nakasayod sa naging basehan it andang National Office .
Gindugang pa ni Mayor Equiña nga ro pinakamabudlay man lang sa SAP hay bukon it distribution kundi ro pag-obra it listahan bangud sa pabag-o bag-o nga guidelines sa pag-identify sa mga qualified nga beneficiaries.
Gusto sigon it National Government nga padasigan, apang ginasiguro man nanda nga qualified ro makabaton bangud nga sanda man ro pagabalikan kon magkasaea.
Ro SAP sa idaeum it Bayanihan to Heal as One Act hay nagatau it allowance nga 6,000 pesos sa kada pinaka pigadong pamilya bilang bulig pinansiyal sa krisis nga ginapangatubang tuga it coronavirus disease o covid 19.
