KALIBO, Aklan—Blangko gihapon ro Philippine National Police (PNP) sa motibo sa pagpatay kay dating Malinao sangguniang bayan John Rondario it Brgy. San Roque sa nasambit nga banwa.
Suno kay P/Corporal Alvin Tamagos it Malinao PNP nga padayun nga nagahueag ro andang intel operatives agud nga matumod ro mga suspek sa krimen.
Bangud sigon sa manami nga record kara hay nabudlayan sanda sa pagtumod sa posibleng suspek.
Nasayuran nga Sabado it gabi-i, Enero 25 kat makabaton it tawag ro andang police station angot sa vehicular accident nga nag-eontad sa Sitio baid sa nasambit nga barangay.
Insigida man nga rumesponde ro mga kapulisan sa lugar , kun sa siin, nakita nanda ro biktima nga nakasab-eay sa anang motorsiklo nga nakasunggab sa puno it niyog nga owa eon it kabuhi.
Narekober sa lugar ro ap-at nga basiwo it kalibre 45 nga baril ag sangka live ammunition.
Natukiban pa nanda nga ro biktima hay may an-om nga tama it bala sa nagkaeain-eain nga parte it eawas nga ginaeakipan it daywa sa anang likod, daywa man sa waea nga parte it anang butkon, sambilog sa tuo nga alima ag sambilog sa idaeum it tiyan.
Ginapatihan nga samtang nagapa-uli hay ginsundan imaw it daywang ka owa nakilaea nga indibidwal nga naka-motorsiklo ag ro sambilog hay nag-overtake agud nga imaw hay abangan ag dayun nga ginbinaril.
Aminado man ro pulisya nga mabudlay man sigon ro andang ginahimo nga imbestigasyon makaron bangud sa kawad-an it testigo.
Suno kay P/Cpl. Tamagos nga owa eon it masyadong tawo sa guwa it andang baeay ko rato nga pang-orason bangud nga mag-eowas nga owa it supply it kuryente hay mauean pa ro tiempo.
May lead eon sigon sanda apang indi pa nanda raya mabulgar.
