HEALTH News–Makaron nga National Nutrition Month hay napahayag it pagkabaeaka ro manabang kapueongan it kongreso sa pagpabilin it malnutrisyon bilang seryosong problema sa Pilipinas.
Ginkasubo ni AnaKalusugan Partylist Rep. Ray Reyes nga mag-eowas sa pagkagutom hay indi man masarangan sa boesa ro tanan nga presyo it mga masustansyang pagkaon sa nasyon.
Suno kay Reyes, pamatuod kara ro datos it National Nutrition Council nga kapin sa 35 percent ukon ap-at sa kada napueong pamilyang Pilipino ro owa nakakakaon it masustanyang pagkaon.
Mag-eowas kara , ginasueong ni Reyes ro House Bill No. 2189, ukon Zero Hunger bill nga tuyo nga matuldukan ro pagkagutom sa nasyon pag-abot it 2030.
Nakabaehag sa proposisyon ro pagtukod it Commission on the Right to Adequate Food nga imaw ro magapanguna sa pagplastar it mga polisya ag magabuyot bilang coordinating body it tanan nga tikang agud nga resolbahon ro pagkagutom ag iba pang kaangot nga isyu.
Ginmitlang ni Reyes nga target it komisyon nga garantiyahan ro mabakod nga suplay it masustansang pagkaon ag siguraduhon nga masarangan sa boesa it tanan nga mga Pilipino ro presyo kara.
Nagaeaum si Reyes nga maipasa eagi ro nasambit nga proposisyon eabi pa ag nagakasinanto raya sa pagtinguha ni Pangueong Ferdinand Marcos Jr., nga maangkon ro food security sa nasyon.
