HEALTH News–Nag apela it pakikipagbueuligan sa kada ahensya it gobyerno, private sector ag publiko ro manabang kapueungan it kongreso agud nga matuldukan ro problema sa malnutrisyon ag child stunting ukon pagiging putot it mga unga.
Ro apela hay ginobra ni House Committee on Labor and Employment Charman ag Rizal Rep. Fidel Nograles kasunod it ginpaguwa nga datos it World Bank nga nagapabilin ro undernutrition sa nasyon kun sa siin sambilog sa kada 3 unga nga Pinoy nga may edad 5 panaba ro nakaexperiensiya it stunting ukon pagka-putot.
May pagtuon man sigon ro United Nations Children’s Fund (Unicef) nga 95 nga unga nga Pinoy ro nagakamatay kada adlaw bangud sa malnutrisyon samtang 27 sa kada 1,000 ro owa eon naka abot sa pagselebrar it andang ika 5 dag-on nga kaadlawan.
Suno kay Nograles masubo ro makarondaya nga datos nga nagakinahangean it insigidang aksyon.
Nauna eon nga ginpuna it Management Association of the Philippines ro sitwasyon it malnutrisyon sa nasyon kun sa siin indi sigon masarangan nga makipagsabayan it mga Filipino sa magiging demand sa masunod nga mga dinag-on.
Ginpahayag ni Nograles nga kinahangean eon nga maghueag ro mga local government units nga pabaskugon ro andang nutrition campaigns.
