Ginabuebanta ni Agriculture Secretary Francisco P. Tiu Laurel, Jr. nga sa Enero it masunod nga dag-on pa mabatyagan it pumueoyo ro manaba nga presyo it bugas sa nasyon.
Raya hay suno kay Laurel hay apisar nga nagdesisyon ro gobyerno nga buhinan ro taripa sa importasyon it bugas halin sa masunod nga buean it Oktubre.
Suno pa kana nga nakakbangon ro mga rice traders sa naging epekto kanda sa nagtaliwna nga El Nino Phenomenon ngani apisar nga nagdesisyon ro gobyerno nga ipatuman ro pagbuhin sa tariff imports sa nasyon hay sa Enero pa it masunod nga dag-on mabatyagan ro manaba nga presyo it bugas bangud sa nag-agi nga kalamidad.
Una eun nga ginpirmahan ni Pangueong Ferdinand Marcos, Jr. ro Executive Order 62 nga nagapahayag it pagnaba it taripa sa rice imports it 15% halin sa dating 35%.
Paagi kara hay ginasaligan ro pagnaba it haega it bugas.
Ginabuebanta it mga economic managers nga abuton it P5 hasta P7 ro buhin sa presyo it bugas kada kilo bangud sa pagnaba it tariff imports.
Sa makaron ro presyo sa mga tindahan ag merkado it well milled rice hay una sa P37 hasta P42 kilo, Sinandomeng – P36 hasta P42, Denorado – P48 hasta P55, Angelica- P43 hasta P46, Jasmine P46-P52 ag Malagkit P60 kada kilo.
