Haom eon ro Manduyog Hill sa pagbaton it mga tumueo-o nga magapatigayon it via crusis ag pagpamaeandong sa paaeabuton nga Semana Santa sa masunod nga dominggo.
Suno kay Ma. Rosary Tesorero, Administrative Officer III-General Services Unit it ASU Banga Campus, haom eon ro mga station of the cross halin sa idaeom pasaka sa ibabaw it bukid.
Sa kamatuoran suno kana, ko nagtaliwan nga dag-on hay nakalista it masobra sa 24,400 nga devotees nga nagpatigayon it pag via crusis ag pagpamaeandong sa Manduyog Hill bilang kaparte it dag-unan nga tradisyon ag kultura it mga katoliko sa tyempo it Holy Week.
Angot kara, nag-apela si Tesorero sa publiko nga ipabilin ro kalinong, katawhay, kalimpyo ag kaayusan sa pagbisita sa mga station of the cross.
Ugalion suno kana nga maging marespeto bangud sa nagkaeain-eain nga indibidwal, magpamilya ag grupo ro nagasaka kada dag-on sa Manduyog Hill agud nga magpamaeandong.
Makaron nga dag-on suno kana hay ginaeauman eon nanda ro libo-libong deboto nga magabisita sa bukid nga nagakatabo man kada dag-on halin kat ginbuksan raya sa publiko maeawig nga tyempo eon ro nakataliwan.
