KALIBO, Aklan — Matapos masamad ro makina it ginasakyan nga baroto, ag haeos pitong adlaw nga nagpa-eutaw-eutaw sa dagat sa tunga it maeain nga tiempo, naeowas it kaparehong mangingisda ro 24-anyos nga soltero sa parte it Tubbataha Reef sa katung-anan it Sulu sea maeapit sa Puerto Princesa City, Palawan ko Disyembre 25, adlaw it Paskwa.
Suno kay Petty Officer 2nd class Nikki Mark Agustin, Sub-Station Commander, Philippine Coast Guard Sub-Station Buruanga, sa bulig it PCG Palawan, gin-uli eon sa anang tiya sa Tagusao Quezon Palawan ag una sa mayad nga kahimtangan ro mangingisdang si Romuel Prado, 24 anyos, residente it Buruanga, Aklan.
Disyembre 18 kat magpaeawod ro eaeaki apang nasamad sigon ro spark plug it anang baroto rason nga nabudlayan eon nga makabalik sa anang ginhalinan.
Agud nga mabuhi, ginakaon sigon nana ro buhi nga mga nadakpan nga isda ag ginasaeod ro tubi-uean para may mainom nga tubi.
Bandang alas-9:45 it agahon it Disyembre 25 kat gintabangan imaw it nag-agi nga tugboat ag ginbira ro anang baroto paagto sa pangpang.
Pagka-aga hay gindaea imaw sa taeatapan it PCG- Rio Tuba Palawan.
Sa makaron hay ginahueat it anang pamilya ro anang pag-uli sa Aklan.
