KALIBO, Aklan—Ginaeauman ro mas pang pagbuhos it mga turista sa isla it Boracay matapos nga aprubahan it Inter-Agency Task Force ro pagpaeawig it industriya it turismo sa tanan nga mga dumueuong umpisa sa Abril 1.
Suno kay Felix Delos Santos, Malay Tourism Operations Officer nga gin-umpisahan eon nanda ro pagpatigayon it sunud-sunod nga pueong partikular sa representante it embahada it South Korea.
Pasado man suno kana ro mga gin inspection nga clinic sa Boracay ag mainland Malay nga posibleng pagaboe-an it negatibong RT-PCR test it mga turistang koreano nga maga-uli sa andang nasyon pagkatapos it bakasyon.
Obligado ro mga raya nga mag-presentar it negatibong laboratory-based antigen result sa uman nga pagbalik sa andang nasyon nga indi eon kinahangean nga mag-quarantine agud nga malikawan ro pagkalhit it COVID-19.
Nasayuran nga ro korea hay sambilog sa top tourist markets it Boracay antes ro pagtama it pandemya.
Ginpasiguro man kara nga hugut nanda nga igapatuman ro health and safety protocols agud nga maproteksyunan ro mga turista ag residente kontra sa sakit.
Sa atubang it uman nga pagdagsa it mga domestic ag foreign tourists sa Boracay, todo-bantay gihapon it mga natungdan ro gintaeana nga carrying capacity it DENR nga 6,405 tourist arrivals per day.
Madumduman nga ko Pebrero 10, ginpasugtan it gobyerno ro pagsueod it mga fully vaccinated tourists halin sa 157 nga visa-free countries.
Kabilugan nga 326 eon nga accommodation establishments sa isla ro naisyuhan it certificate of authority to operate nga may katumbas nga 12,000 rooms.
