KALIBO, Aklan–Naga-abot sa 1,866,094 ka mga estudyante sa mga pampublikong eskwelahan sa bilog nga Western Visayas ro nagpartisipar sa 5 days in person classes umpisa makaron nga adlaw, Nobyembre 2.
Raya ro ginpaathag ni Dr. Hernani Escullar Jr. tagapaghambae it DepEd-6 kasunod it opisyal nga pag-umpisa it full implementation it face-to-face classes.
Buot hambaeon kara, indi eon maggamit it modular ukon blended learning modality ro mga eskwelahan.
Apang, may pila sigon nga mga eskwelahan nga naghinyu nga indi anay magpatuman it in person classes matapos nga sue-ubon it baha ro pila sa andang classroom.
Gindugang pa kara nga ro probinsya it Antique hay nagpagguwa man it sangka Executive Order kung siin nakabaehag nga sa masunod nga dominggo pa sanda pormal nga magapatuman it in person classes matapos ro pagpanaeasa it bagyong Paeng.
Sa pihak nga parte, nakalista ro taeatapan it kapin sa 169 ka mga classroom nga nakaangkon it minor damage, 48 nga major damage ag 24 nga totally damage.
Naga-abot man sigon sa 254 nga mga classroom sa bilog nga rehiyon ro gingamit bilang evacuation center.
Mag-euwas kara, nakalista man sanda it kapin sa 1,799 nga mga school furniture nga nasamad, 535,286 nga mga learning materials nga na-damage ag 99 nga computer equipment ro nakaangko it kasamaran.
