KALIBO, Aklan—Naga-abot sa haeos 35,000 turista ro nagbisita sa isla it Boracay ko buean it Hulyo.
Sa datos it Malay Tourism Office, umabot sa 35,108 ro mga turistang nagbakasyon sa Boracay umpisa Hulyo 1 hasta 31, 2021.
Ginkalipay man ni Chief Tourism Operations Officer Felix delos Santos ro numero it tourist arrivals matapos nga nag-eampas raya sa andang target nga 30,000.
Nagapabilin nga top source market it Boracay ro National Capital Region (NCR) nga may 22,617 tourist arrivals.
Nagpangaywa ro Calabarzon sa 7,739; ikatlo ro Central Luzon sa 2,693; pang-apa-t ro mga taga-Aklan sa 598 ag panglima ro naghalin sa nagkaeain-eain nga lugar sa Western Visayas sa 365.
Amat-amat eon kunta nga nagabalik ro pagbaskog it tourism industry sa isla ko Hulyo matapos ro pagbuhos it mga turista kaibahan ro pilang sikat nga mga showbiz personalities ag mga politiko.
Ginaeauman nga uman nga magahina ro tourist arrivals makaron nga Agosto bangud sa uman nga pagpatuman it Enhanced Community Quarantine (ECQ) sa NCR ag kaiping nga mga probinsiya.
