KALIBO, Aklan — Masobra sa 300 nga pulis ro nagtililipon sa Camp Pastor Martelino sa Barangay New Buswang Kalibo, Aklan para sa send-off ceremony sa nagahilapit nga eleksyon sa Mayo 13.
Raya hay bilang kaparte it tikang agud nga masiguro ro eowas, maayos ag malinong nga eleksyon sa probinsiya it Aklan.
Kaibahan sa ginbilog nga security force ro mga uniformed police nga ginpadaea it Police Regional Office (PRO)-6.
Ginpasiguro ni Aklan Police Provincial Director P/Col. Lope Manlapaz ro pagsunod it PNP sa standard operational procedures ag code of conduct kamana man ro tawhanong kinamatarung agud nga mapabilin nga maayos ro eleksyon.
Samtang, gin-insister ni Atty. Elizabeth Doronilla, Provincial Election Supervisor it Commission on Elections (Comelec)-Aklan sa pulisya nga himuon it tama ro andang mandato agud nga mataw-an it seguridad ro mga botante ag maprotektahan ro boto it pumueuyu.
