KALIBO, Aklan— Nakataeanang magdungka sa isla it Boracay ro pangaywang cruise ship nga magabisita sa sikat nga isla makataliwan ro masobra sa sang buean halin kat buksan raya sa publiko ko Oktubre 26.
Suno kay Caticlan jetty port administrator Nieven Maquirang, magaabot sa Disyembre 19, 2018 ro cruise liner nga MS World Dream sakay ro masobra sa 3,400 mga turista ag 2,000 mga crew.
Nauna eon nga nagdungka ko Disyembre 6 ro MS Star Legend cruise liner sakay ro 372 mga turista ag crew kon siin, tunga sa adlaw sigon sandang naglibot ag napahanga sa bag-ong hitsura it Boracay.
Ro MS Star Legend ro unang cruise liner nga nagdungka sa nasambitang isla matapos ro an-om nga bueang pagpasarado kara ko Abril 26 bangud sa mga environmental issues.
Nasayuran nga masobra sa 48 cruise liners ro naka-schedule kunta nga magbisita sa Boracay makaron nga dag-on apang bangud sa an-om nga bueang closure hay daeayon nga nakansela ro pila sa mga raya.
Sa 48 cruise liner, 16 kara ro nakaabot ag nagdaea it maabong bisita antes ro Boracay closure.
