Ginaduso makaron ni kalibo sangguniang bayan member matt aaron guzman nga makaangkon it master plan ro lokal nga gobyerno partikular ro pagpaeapad sa karsada paagto sa ginbakae nga masobra sa 11 ektaryang eugta sa barangay nalook, kalibo.
Ginapanan-aw nga sa masunod nga mga dinag-on hay magiging sentro it banwa it kalibo ro nasambit nga lugar.
Gusto it konsehal nga antes nga patindugan it mga istraktura sa lugar hay maayos anay ro karsada paagto idtu.
Tuyo kara nga indi matuead sa naexperiensiyahan makaron nga problema sa barangay poblacion nga masyadong mapiot ro mga karsada ag owa it nagakaigo nga parking area.
Nasayuran nga base sa proposisyon it LGU kalibo, planong ibutang sa lugar ro rural health unit ukon RHU-3, legislative office it SB-kalibo , district hospital , housing unit , convention center , mga taeatapan it national governments ag iba pa.
Ginapanan-aw pa nga igapatindog sa lugar ro haeos 381 units it pabaeay.
Sa makaron ro daean nga paagto sa lugar hay two-lanes eamang nga posibleng maging problema ro pag-gutok it daeagan it trapiko sa ulihi .
