KALIBO, Aklan — Gulping nagbag-o ro huyop it hangin ag nagkaayos eon sanday Department of Environment and Natural Resources (DENR) Undersecretary Benny Antiporda ag Singaporean nga negosyanteng si Peter Tay sa isla it Boracay.
Nag-ugat ro nasambitang alitan sa reklamo it negosyante sa Malay Police Station nga ginpahuya, ginkwelyuhan ag ginpaeag pa sigon nga inde pagtaw-an it Certificate of Compliance it nasambitang opisyal sa sangka pueong it Compliant Association of Boracay (CAB) para sa mga travel agency operators.
Sa nagtaliwan nga press conference sa Boracay, nagpaathag si Usec. Antiporda sa natabo ag ginpamalibaran ro mga pabangod kontra kana.
Pamaagi sa mga maeaeapit nga amigo, nagkaistorya ag nagkaintindihan ro daywa.
Nasayuran nga ginkwestyon it negosyante ro bag-ong patakaran it task force bangud ikalugi sigon nanda raya.
Sa makaron ro mga turistang magapatigayon it water sports activities hay kinahang-ean nga sa mga hotels ag resorts magpa-book agud malikawan ro mga commissioners nga nagapangulit sa mga bisita sa front beach.
Kadungan kara, nagpasaeamat si Tay sa Boracay Inter-Agency Task Force sa ginhimong rehabilitasyon sa isla.
Si Tay hay board of directors it Boracay Foundation Incorporated (BFI), Tourism Congress Philippines ag Liason Officer for Consul Assist nga gintaeana it China Embassy sa Manila.
