KALIBO, Aklan—Paagto eon sa anang ikaywang termino si incumbent Kalibo mayor Juris Bautista-Sucro matapos nga makaangkon it mabahoe nga abanse sa anang naka-engkwentru nga si dating kalibo mayor William Lachica base sa resulta it bag-o eamang natapos nga national and local elections.
Si Sucro hay nakabo-oe it 23,264 nga boto samtang ro anang hugut nga karibal nga si Lachica hay may 8,990 eamang nga boto.
Nasayuran nga nauna eon nga nabansagan si Mayor Sucro bilang pinakabata nga naging alkalde it kalibo sa kasaysayan sa edad nana kato nga 35-anyos.
Nagdaog imaw sa eleksyon pinaagi sa anang campaign slogan nga “Bagong Kalibo”, sangka promisa nga magahatud it bag-o ag mas maayos nga pang-ginobyerno.
Sa pihak nga parte, sa owa it swerte ro running mate ni Sucro nga si incumbent Kalibo vice mayor Dr. Cynthia Dela Cruz hay napiyerde it dating konsehal ag bata nga si Philip Yerro-Kimpo.
Si Kimpo nga nagpadaeagan bilang independent candidate hay nakabo-oe it boto nga 19,780 kumpara kay Dela Cruz nga nakabo-oe eamang it 10,429 votes.
Kaibahan sa ginproklama makaron nga adlaw sa banwa it kalibo hay ro mga elected Sangguniang Bayan members nga sanday reelectionists Matt Guzman, Ketchie Luces, Raymar Rebaldo, Atty. Christine dela Cruz, William Lachica Jr., ag Ronald Marte kamana man sanday dating Kalibo Mayor Engr. Emerson Lachica ag Rex Bautista.
