KALIBO, Aklan—Ginpaathag ni Municipal Disaster Risk Reduction Management Office (MDRRMO) Kalibo head Terrence Jun Toriano ro importansya ko pagsuksok it face shield.
Raya hay kasunod sa mando it National Task Force on Covid-19 nga mandatory eon ro pagsuksok it face shield kon nagasueod sa mga establisyimento komersyal.
Suno kana, maskin maeapad ro space it sangka lugar hay importante gihapon nga magsuksok it face shield mag-eowas pa sa mandatory eon nga pagsuksok it face mask agud eubus nga malikawan ro virus nga nagadaea it makamaeatay nga sakit nga Covid-19.
Makata-o sigon it dugang nga proteksyon kontra sa virus kon nagasuksok it face shield partikular sa mga pampublikong lugar.
Mag-eowas kara, kon mataeopangdan sa mga establisyimento hay may logbook, raya sigon hay para sa igapatigayon nga contact tracing rason nga dapat minatuod nga impormasyon ro ibutang ag kinahang-ean nga seryosohon raya it tanan.
Nauna eon nga ginrekomenda it IATF sa mga pasahero it mga pampublikong saeakyan ro pagsuksok it face shield maskin nga ro sangka lugar hay una sa modified general community quarantine.
