KALIBO, Aklan—Nakapahaum eon ro response plan it Municipal Disaster Risk Reduction and Management Office ukon MDRRMO-Kalibo agud nga masiguro ro kaeowasan ag seguridad it publiko sa selebrasyon it kapistahan ni Sr. San Juan de Bautista sa Lunes, Hunyo 24.
Suno kay Terence Toriano, head it MDRRMO Kalibo nga naka-alerto ro andang mga tactical emergency operation center kun sa siin nakipag-pueong eon sanda sa nagkaeain-eain nga barangay disaster risk reduction and management committees nga maeapit sa mga kasubaan ag baybayon agud nga magbulig kanda sa pag-monitor ag insigidang maka-responde sa anuman nga mga insidente ukon emergency nga igapaabot kanda.
Bangud sa mga nagkaeain-eain nga mga activities, ginpahayag it MDRRMO head nga pagatutukan nanda ro mga lugar nga maeapit sa Aklan river sa Barangay Poblacion hasta sa Tinigaw.
Magadeploy man sanda it medical ag water teams sa Lambingan Beach hasta sa Barangay Mabilo kamana man sa Pook Jetty port hasta sa Barangay Caano, Kalibo kun sa siin igaplastar ro andang aluminum boat.
Mag-eowas sa mga tawuhan it MDRRMO, magabantay man sa nasambit nga mga lugar ro katapo it Bureau of Fire Protection, Philippine Coast Guard, Department of Public Works and Highways, Philippine National Police , mga volunteers ag iba pang natungdan nga ahensiya it gobyerno .
Magabutang man sanda it “no swimming” sign sa pilang parte it baybayon sa Pook Jetty Port ag bukana it Aklan river bangud nga masyadong delikado sa mga nagapaligos .
Iga-suhestiyon man sigon nanda sa DPWH nga magbutang it boat ramp sa Jetty Port.
Sa pihak nga parte, may mga tawuhan man sigon sanda nga igadeploy nga magabantay sa daeagan it trapiko.
Abiso pa nana sa mga pumueuyu nga dahanan man ro andang ikamayad nga eawas eabi eon kon mainit ro tiempo ag indi magpasobra it inom it aeak.
Maga-umpisa ro andang pagbantay hin-aga nga adlaw it domingo, Hunyo 23 hasta 25.
