KALIBO, Aklan—Preparado ro Municipal Disaster Risk Reduction and Management Office ukon MDRRMO-Kalibo sa coronavirus disease ukon COVID-19 engkaso nga matabu ro worst case scenario nga makasueod sa banwa ro makamaeatay nga sakit.
Suno kay Terrence Jun Toriano, head it MDRRMO-Kalibo nga sa kamatuoran hay haeos sang buean eon ro andang pagpahaum kara kaibahan ro andang mga kagamitan kapareho it personal protective equipment ukon PPE.
Matapos sigon nga magamit ro andang mga equipment hay gina-disinfect nanda ro andang mga kagamitan.
Agud nga masiguro nga maayos ro pagresponde sa mga posibleng kaso it COVID-19, ro andang multicab ro andang gintaeana para sa pag transport sa mga PUIs ukon Persons under Investigation ag Persons Under Monitoring ukon PMUs bangud nga ro andang ambulansiya hay pirme nanda nga ginagamit.
Ginalimitahan man sigon nanda sa 2 hasta nga 3 personnel ro andang ginapa-responde agud nga malikawan nga matapnan ro tanan.
Magapatigayon man suno kana sanda it training angot sa bio-hazard containment.
Samtang, gindugang pa ni Toriano nga nagapanguna man nanda nga obligasyon ro monitoring kaibahan ro municipal health office agud nga malikawan nga makasueod ro makamaeatay nga virus.
Sa pihak nga parte, bangud sa COVID-19, ginkansela man kahapon ro ginpatigayon nga national simultaneous earthquake drill.
Dugang pa nga pagalimitahan ro mga aktibidades sa nagahilapit nga pagdumdum sa XIX Martyrs it Aklan sa Marso 23, kun sa siin, wreath laying eon lang ro pagahimuon agud nga malikawan ro pagtililipon it maabung tawo.
Maabu man sigon sanda nga activity nga ginpaisoe anay.
Ginbo-oe man sigon ro log-in-log-out sa entrance door it munisipyo it Kalibo kundi sa kada departamento eon lang kamana man nga temporaryong ginkansela ro andang biometrics.
Mas eowas sigon ro pirme nga paghugas it alima kaysa ro paggamit it alcohol.
