KALIBO, Aklan — Patay ro sangka miyembro it Municipal Disaster Risk Reduction and Management Office (MDRRMO)-New Washington matapos nga mag-angkon it grabeng nina sa ueo ag iba pang parte it eawas kat bumalintong ro anang ginamaneho nga tricycle sa Brgy. Ochando, New Washington, Sabado it gabi-i.
Nadaea pa sa ospital ro biktimang si Shirlito “Toto” Zonio, 34, residente it Brgy. Dumaguit sa nasambit nga banwa, apang gindeklarang dead on arrival.
Suno sa pulisya, nasaeawig ni Zonio ro sangka nakaparadang tricycle sa kilid it karsada rason nga bumaligtad ro anang ginamaneho nga tricycle ag naigpit ro anang ueo it atup it anang saeakyan.
Ginasugid nga antes ro insidente hay naghapit anay ro biktima sa andang opisina halin sa banwa it Libacao.
Nataeupangdan it anang mga katrabaho nga una raya sa impluwensiya it makahieilong nga ilimnon rason nga gin-inga-an nga indi eon magmaneho, apang nagpamilit sigon raya.
Eubus man nga ginkakibot ag ginkasubo it anang mga kaibahan ro nasambit nga insidente.
