Nakaplastar eon ro mga aktibidad may kaangtanan sa selebrasyon it Love Boracay makaron nga dag-on nga maga-umpisa sa Abril 28 hasta Mayo 1.
Suno kay Rex Aguirre, head it Culture and Arts and Special Events Division it Malay Municipal Tourism Office nga pagataw-an it importansiya sa ap-at nga adlaw nga selebrasyon ro pagiging family-friendly travel destination it Boracay.
Bangud kara, indi eon makaangkon it paka-aga nga party sa beachfront kapareho it dating nakasanayan.
Kaibahan sa mga aktibidad ro pagpatigayon it Project Prestine, sangka clean-up drive sa baybayon it isla nga paga-intrahan it nagkaeain-eain nga frontliners association nga pagasundan it parade of sea and aqua sports assets ag open dance contest.
Samtang , sa Abril 29, makaangkon it sangka family fun run for mental wellness nga pagapangunahan ni Miss Universe 1999 1st runner-up Mirriam Quiambao ag pagkatapos hay ro pagpatigayon it beach sports kapareho it soccer, volleyball ag fribee.
Makaangkon man it music and arts festival nga pagasundan it summer night party.//sa Abril 30, nakataeana ro bike race ag sa Mayo 1 man ro Paraw Regatta.
Ginpahayag pa ni Aguirre nga magadere-deretso ro iba pang aktibidad angot sa Love Boracay sa Fiesta de Obrero ro kapistahan it banwa it Malay.
Umpisa makaron nga 2023, ro LGU-Malay eon ro magadumaea sa Love Boracay.
Gin organisa it Boracay Inter-Agency Management Group ro Love Boracay matapos ro ginpatigayon nga an-um nga buean nga paglimpyo ag rehabilitasyon agud nga matur-an ro mga turista, residente ag mga stakeholders sa pag-amlig sa palibot ag mapabilin ro pagbaskog it turismo sa lugar.
Ro nasambit nga event hay bilang kabaylo it sikat nga LaBoracay nga nagahakot it libu-libong mga turista kada dag-on.
