KALIBO, Aklan—Gin engganyo ni Malay acting Mayor Frolibar Bautista ro mga nagapanag-iya it ayam nga bantayan ro andang mga alaga agud nga maprotektahan ro mga turista ag mga residente sa isla it Boracay.
Problema gihapon sa isla ro mga asong kalye ag mga alagang ayam nga nagawinarang sa mga karsadahon ag maskin sa baybayon it isla nga nagatuga it health hazards sa komunidad.
Bangud kara, nagtanyag ro LGU-Malay nga magatau it insentibo sa sin-o man nga makadakop it mga nagawinarang nga ayam ag kuring nga ginapabay-an it andang mga amo.
Suno kay Mayor Bautista nga nagtukod sanda it task force agud nga magbantay sa mga nagawinarang nga ayam ag kuring ag naglunsar it reward system para sa mga boluntaryong makadakop it mga raya.
Sa mga makadakop it ayam, raya hay may bayad nga 200 pesos ag 50 pesos sa kada kuring.
Sa idaeum it Municipal Ordinance No. 92, ro mga stray animals nga nagawinarang sa baybayon ag iba pang pampublikong lugar sa isla hay pagadakpon ag gina-impound ukon gina disposed it mga otorisadong ahente ukon barangay.
