KALIBO, Aklan — Nagahueat ro Land Transportation Franchising and Regulatory Board (LTFRB) Region 6 it opisyal nga kopya it sangka board resolution ukon memorandum circular nga nagapasugot sa uman nga pagbukas it aplikasyon para sa consolidation it mga pampublikong saeakyan ukon PUVs sa idaeum it Public Transport Modernization Program it gobyerno.
Sa oras nga mabaton ro opisyal nga resolusyon ukon memo, maga-umpisa eagi ro LTFRB-6 sa pagbaton it mga aplikasyon.
Ginkumpirma ni Atty. Salvador Altura, Jr., legal counsel ag tagapaghambae it LTFRB-6 nga nakabaton eon ro andang taeatapan it paunang abiso halin sa central office.
Nauna eon nga gin-anunsyo ni LTFRB chairperson Teofilo Guadiz III nga ro mga bukon pa it consolidated nga mga driver ag operator it PUVs hay pwedeng maka-apply para sa konsolidasyon sa idaeum it PTMP, nga dating kilaea bilang PUV Modernization Program.
Ginpahayag ni Guadiz nga ro tiempo it aplikasyon hay magabuhay it 45 diyas bilang sabat sa hinyu it Senado.
Raya hay nag-umpisa ko Oktubre 15 ag may deadline nga hasta sa Nobyembre 28.
Sa pihak kara, ginklaru nana nga ro mga driver ag operator nga bukon pa it consolidated hay ginapasugtan nga mag pasakop eamang sa mga naga-eksister eon nga kooperatiba ag owa ginapasugtan nga magbilog it bag-o.
