KALIBO, Aklan–Ro kidney ukon bato ro nagsaea it nagkaeain-eain nga bagay nga nagadaeagan sa sueod it eawas kapareho it dugo, pagkaon ag tubi.
Bangud kara, ro eawas hay nalilimpyuhan halin sa mga higko ukon toxin.
Suno kay Dr. Marymil Dignadice, Adult Medicine-Nephrology nga ro kidney hay 24 oras nga nagatrabaho rason nga ginakinahang-ean ro nagakaigo nga paghaeong sa atun nga body organ.
Kung indi magampanan it bato it maayos ro obligasyon kara, posibleng ro sangka tawo hay makaangkon it chronic kidney disease.
Ginapahayag nga naga-abot eon sa 2.3 million nga mga Pinoy ro apektado it nasambit nga sakit.
Maabu nga komplikasyon ro sakit sa bato bangud owa nasasaea it maayos ro mga higko sa sueod it eawas.
Pila sa mga sintomas kara hay ro pagmanas sa siki ag alima; kabudlay sa pagginhawa; pagnaba it timbang; pulikat; naga-iba ro kulay it ihi ukon masami ro pag-ihi; pagpangatoe; erectile dysfunction ag maabu nga iba pa.
Mag-euwas kara, mas mataas man ro tiyansang makaangkon it edema ag kidney stones bangud sa limitadong abilidad it bato nga maglimpyo it eawas.
Pila sa mga masami nga ginahalinan it sakit sa bato hay ro mga masunod: diabetes, high blood, lupus, pag-inom it steroids, baradong renal artery, Polycystic kidney disease, Pyelonephritis ag Glomerulonephritis.
Agud nga makalikaw sa nasambit nga sakit, importante ro regular nga pag-ehersisyo, pag-angkon it healthy lifestyle ag insigidang magpakonsulta sa doktor sa oras nga makabatyag it anumang sintomas agud nga mataw-an it nagakaigo nga medikasyon.
