KALIBO, AKLAN — Sa Boracay eon ro pilang mga delegado para sa Association of Southeast Asian Nations (ASEAN) meetings nga pormal nga maga umpisa makaron nga adlaw.
Raya ro kinumpirma ni Supt. Gilbert Gorero, tagapaghambae it Police Regional Office (PRO-6) at 2017 ASEAN Summit Boracay.
Gin klaro kara nga bukon it overkill ro deployment it sangkaterbang security forces sa isla kun siin sambilog sigon rayang standard security preparations sa mga international events.
Bukon sigon ro isla ag Aklan ro nakataya kara kundi ro integridad it Pilipinas.
Ro kaeowasan sigon it mga opisyal ro andang gina isip agud masigurong owa it matabong major incidents sa pag-host it Boracay sa pagahiwatong pagpueong.
Suno pa kay Gorero nga owa it security threats sa Boracay ag bug-os nga Western Visayas.
Nasayuran nga masobra sa 3,000 nga security personnel ro nakakalat sa magkaeain-eain nga lugar sa Boracay partikular eon sa venue ag billeting area it mga delegado.
Bantay sarado man it Philippine Navy ro baybayon sa palibot it isla bilang kaparte it security preparations.
