KALIBO, Aklan–Ginaeauman eon it mga ekonomista ro mas pa nga pagdasig it inlation rate ukon pagtaas it presyo it mga baeak-eon ag serbisyo hasta sa buean it Disyembre.
Sa record it Philippine Statistic Authority ukon PSA, nag-abot sa 7.7% ro inflation rate ko buean it Oktubre kumpara sa 6.9% ko Setyembre.
Suno kay Mr. Ramon Quimpo, sangka ekonomista ag manugturo nga raya hay tuga it nagkaeain-eain nga factors kapareho it nagapadayun nga giyera sa tunga it Russia ag Ukraine, nag-agi nga mga kalamidad ag ro pagpasaka it interest rates it bangko sentral ng pilipinas ukon BSP agud nga mapabaskog ro piso ag malimitahan ro mga naga-utang.
Ginpahayag dugang nga madasig nga nagsaka ro presyo it mga pagkaon kapareho it tinuea, isda ag iba pa bangud sa nag-agi nga mga bagyo ag nasamad ro mga pananum.
Nagtaas man ro sukot sa renta sa baeay, sukot sa tubi, kuryente, gas ag iba pang produktong petrolyo.
Sa pihak nga parte, ginpahayag pa ni Quimpo nga bukon pa it raya ro ginaeauman nga peak ukon pinakamataas nga inflation rate makaron nga dag-on bangud sa nagahilapit nga holiday season, paghina it piso kontra dolyar ag epekto it nag-agi nga bagyong paeng sa mga pananum.
