BALITANG Espesyal — Sangka grupo it mga engineer sa Prinsenbeek, Netherlands ro nakalista it world record matapos sanda nga makabilog it pinakamahabang bisikleta sa bilog nga kalibutan.
Ginkumpirma it records keeping organization nga Guinness World Records nga sanday Ivan Schalk, Joost Sweep, Jimmy Vermeeren, Sander Vissers, Bas Zuidema, Steffie van de Riet, Daan Husson, Toine Kleemans, Jasper Korving ag Op De Beek Hebben We De Langste hay naka-obra it “Longest Bicycle” bangud nga may haba raya nga 55.16 meters ukon 180 feet and 11 inches.
Maikumpara raya sa kataason it Leaning Tower of Pisa sa Italy nga may waeong panaegan.
Suno sa leader it grupo nga si Ivan Schalk, unga pa eamang imaw hay handum eon nana nga makabilog it mahabang bisikleta.
Umpisa nga mabasa nana sa librong Guinness Book of World Records nga pwedeng maka-obra it mahabang bisikleta, naging sambilog eon raya sa anang life long dream.
Nagatrabaho si Ivan Schalk nga taga-obra it mga festival float ag gin-umpisahan nana nga obrahon ro bisikleta ko 2018 sa kada owa imaw it ginakasakuan.
Napundo eamang ro anang pag-obra it bisikleta it daywang dag-on ko kasagsagan it COVID-19 pandemic.
Matapos raya nga pasidunggan it Guinness, gin-displey ro bisikleta sa local history museum it Prinsenbeek.
