KALIBO, Aklan–Kapin sa 95 porsyento eon nga haum ro mga eskwelahan sa bilog nga probinsya it Aklan angot sa nakataeana nga pagpatigayun it full implementation it face-to-face classes.
Suno kay Dr. Feliciano Buenafe, Schools Division Superintendent it DepEd-Aklan nga sigidas ro andang paglibot sa mga eskwelahan ag pagpasiguro nga dapat syento porsyento nga maging preparado para sa uman nga pagbalik it in person classes umpisa sa buean it Nobyembre para sa School Year 2022 to 2023.
Aminado si Dr. Buenafe nga maabo nga adjustment ro kinahang-ean nanda nga himuon bangud masobra daywang dag-on nga owa it physical nga interaction ro mga estudyante sa mga eskwelahan.
Kaibahan sigon sa andang preparasyon hay ro pag-angkon it mental health program bangud natueopangdan nanda nga mabudlay para sa mga estudyante nga mag-adjust.
Base sa anunsyo it Department of Education, gina-engganyo ro pagpabakuna apang bukon raya it requirement sa mga manugturo ag estudyante para makapasakop sa face-to-face classes.
Nauna eon nga gin-anunsyo it taeatapan nga pormal nga maga-umpisa ro panibag-ong School year sa Agusto 22 ag magatapos sa Hulyo 7, 2023.
